कपिलवस्तु / छोराले विदेशमा राम्रो काम नपाएको भन्दै बुबाले वैदेशिक रोजगारीमा पठाउने एजेन्टको गोली हानी हत्या गरेका छन्। विजयनगर गाउँपालिका १ का ५० वर्षीय पशुपति कुर्मीले कृष्णनगर नगरपालिका १० बस्दै आएका ५५ वर्षीय पारस पुरीलाई गोली हानी हत्या गरेका हुन् ।

वैदेशिक रोजगारका लागि विदेश पठाउने कार्यमा संलग्न रहेका पुरीको बिहिबार राति साढे ९ बजे गोली हानी हत्या भएको थियो। हत्यापछि फरार रहेका कुर्मीलाई कपिलवस्तु नगरपालिका नेपाल-भारत सीमाबाट पक्राउ गरिएको प्रहरी नायब उपरीक्षक धर्मराज भण्डारीले जानकारी दिएका छन् ।

बहराइन पठाउन १ लाख १५ हजार रुपैयाँ लिएका पुरीलाई छोराले राम्रो कम्पनी र तलब नपाएको भन्दै कुर्मीले पैसा फिर्ता मागेका थिए। पटकपटक भन्दा  पैसा नपाएपछि कुर्मीले मार्ने योजना बनाएका थिए ।

यस घटनामा कुर्मी सहित तीन जना व्यक्ति प्रतिवादी छन्। उनीहरूले भारतको सिद्धार्थनगर ढकारी ग्राममा बसेर हत्याको योजना बनाएको र पुरीले पैसा नदिएपछि कटुवा पेस्तोलबाट गोली हानी हत्या गरेको अनुसन्धानका क्रममा पुष्टी भएको हो।