गलेश्वर / निरन्तर वर्षाका कारण म्याग्दीको
रघुगङ्गा गाउँपालिका–३ को बस्ती पहिरोको उच्च जोखिममा परेको छ । गलेश्वर–पिप्ले–भगवती–बेगखोला सडक
निर्माणमा लापर्बाही हुदाँ बस्ती पहिरोको जोखिममा परेको स्थानीयवासीले बताएका छन् ।
गत वर्षदेखि निर्माण सुरु गरिएको सडक कमजोर र
भिरालो जमीनमा जथाभावीरूपमा बनाउँदा पहिरो चलेको स्थानीयवासी बताउँछन् । सडक
बनाउँदा पर्याप्त सावधानी नअपनाएका कारण बस्तीमाथि पहिरो खस्न थालेको स्थानीयवासी
टककुमारी छन्त्यालले बताएकि छन् । कमजोर भूभागमा सडक बनाउन डोजरले जथाभावी
भत्काउनु र त्यसपछि संरक्षण र रोकथामको काम नगरेका कारण पूरै पाखो खस्न थालेको
छन्त्यालको भनाइ छ। वर्षौंदेखि बसेको घर छाडेर हिँड्नुपर्ने अवस्था आउन लागेको
छन्त्यालले बताएकि छन् ।
“बस्तीमाथिको
पाखोबाट खसेको पहिरोले घर पुर्न लागेको छ । दुई महिनायता राति निदाउन पाएका छैनौँ”, छन्त्याल भन्छिन्, “३५ वर्षदेखि
बसेको थातथलो छोडेर कहाँ जाने ? हामीहरुलाई चिन्ता लागेको छ।”
गत वर्षदेखि बस्तीमाथिको जमीन चर्किएर पहिरो
खस्न थालेको थियो । हिउँदमा कुनै निकायले पनि संरक्षणको पहल नगर्दाको परिणाम यस
पटकको बर्खामा देखिन थालेको भन्दै स्थानीयवासी आक्रोशित बनेका छन् । यहाँका कतिपय
बासिन्दा घर छोडेर हिँड्ने तर्खरमा रहेका र कतिले वल्लो गलेश्वर बजारमा भाडामा
कोठा लिएर बसेका स्थानीयवासी तिलबहादुर पुनले बताएका छन् ।
बस्ती जोगाउन संरक्षणको काम गर्नका लागि गत
वर्षदेखि नै सम्बन्धित निकायको ध्यानाकर्षण गराइए पनि कुनै काम नभएको स्थानीयवासी
बताउँछन् । सम्बन्धित निकायबाट पहिरो नियन्त्रण, भलबाढी व्यवस्थापन र बस्ती संरक्षणमा
केही काम हुन नसकेका कारण बस्ती जोखिममा परेको गलेश्वरवासीको भनाइ छ । सडक निर्माण
गर्दा लापर्बाही भएका कारण बस्ती जोखिममा परेको र सडक पनि दिगो नभएको स्थानीय
बुद्धिजीवी दीपक कार्की विखर्चीले बताएका छन् । जथाभावी खनिएका सडकका कारण
गलेश्वरपारिको बस्ती मात्रै होइन म्याग्दीका १९ वटा बस्तीका सयौँ घर र परिवार
जोखिममा छन् ।
