सिन्धुपाल्चोक / मनसुन सुरु भएयता लगातार परेको वर्षाका कारण मेलम्ची नगरपालिका –८ केउरानीका ३४ घर जोखिममा परेका छन् । पहिराका कारण खैरेका २७ र छाँयालीका सात घर जोखिममा परेका हुन् ।
स्थानीयवासी कान्छामान दोङका अनुसार पोहोरदेखि नै पहिरो जान थालेका ठाउँमा यसपालि पनि पहिरो आएर खैरेका बस्ती जोखिममा परेका हुन् । निरन्तर पहिरो खस्न थालेपछि स्थानीयवासी त्रसित भएको उनले बताएका छन् ।
पटकपटक वडाका प्राविधिकलाई यसबारे जानकारी गराउँदा पनि चासो नदिएको उनले गुनासो गरेका छन् । वडा नं ८ का वडाध्यक्ष ठकराज गिरीले उनीहरूलाई तत्काल अस्थायी बासको व्यवस्था गर्नुपर्ने बताएका छन्।
यसअघि जिल्ला विपत् व्यवस्थापन समितिलाई जानकारी गराई बस्तीको विज्ञ सहित अनुगमन गर्न आग्रह गरिएको तर सुनुवाइ नगरेको उनको भनाइ छ ।
त्यसैगरी पहिराले प्रभावित मेलम्ची –६ नेपाने बगरटोलका १७ परिवारलाई राहत वितरण गरिएको छ ।
