झापा / गैँडाको खाग अवैध रुपमा बेच्न खोज्ने ६ जनालाई प्रहरीले पक्राउ गरेको छ ।
काठमाडौंको बौद्धबाट एकथान गैँडाको खाग सहित उनीहरूलाई पक्राउ गरिएको महानगरीय अपराध महाशाखाका एसएसपी चन्द्र कुवेर खापुङले बताएका छन ।
गैँडाको खागको तौल १ किलो १० ग्राम छ । कारोबारीले सो खाग ४० लाखमा बेच्ने गरी ‘डिल’ गरेका थिए ।
बेच्नु अघि बौद्ध स्तूपा स्थित साँघुरो गल्लीमा उनीहरूले खाग हेर्न बोलाए पछि ग्राहकसँगै गएका महाशाखाका प्रहरीले उनीहरूलाई पक्राउ गरेका हुन् । खागको अवैध कारोबार गर्नेहरूलाई महाशाखाले कानुनी कारवाहीका लागी डिभिजन बन कार्यालय हात्तीसारमा बुझाएको छ ।
पक्राउ पर्नेमा काभ्रे घर भएका ४१ वर्षीय बिरमान तामाङ, ४२ वर्षीय वेद बहादुर दनुवार, २० वर्षीय नवराज गिरी र ३२ वर्षीय भीम तामाङ छन् ।
काभ्रेकै पाँचखाल नगरपालिका –३ घर भएका ३१ वर्षीय सोहन कार्की र सिन्धुली घर भएका ४१ वर्षीय भीम बहादुर थिङ पनि पक्राउ परेका छन् ।
लुकाई छिपाई राखिएको सो खाग चितवनबाट ल्याएको आरोपहरूले प्रहरीलाई बताएका छन् ।
