काठमाडौं / त्रिभुवन अन्तर्राष्ट्रिय विमानस्थलबाट प्रहरीले एक जनालाई करिब एक किलो सुनसहित पक्राउ गरेको छ ।
एयर अरेबियाको विमानबाट नेपाल फर्किएका सिन्धुपाल्चोकका दावा छिरिङ शेर्पालाई प्रहरीले पक्राउ गरेको विमानस्थल प्रहरी स्रोतले जानकारी दिएको छ ।
स्रोतका अनुसार दावाले गुद्वारमा करिब एक किलो सुन लुकाएर ल्याएका थिए । आशंका लगेपछि विमानस्थल प्रहरीले सोधपुछ गर्दा उनले गुद्वारबाट सुन लुकाएर ल्याएको बयान दिएका थिए । दावाले ०९३६८६१८ नम्बरको पासपोर्टबाट गत नोभेम्बर १६ मा दुबई गएका थिए। थप अनुसन्धान भइरहेको प्रहरीले जनाएको छ ।
यस्तै आइफोन १३ प्रो र ५० ग्राम सुनसहित अर्का एकजना विमानस्थलबाट पक्राउ परेका छन् । हिमाल एयरलाइन्सको विमानबाट नेपाल फर्किएका नवराज परियार आइफोन र ५० ग्राम सुनसहित पक्राउ परेको विमानस्थल प्रहरी प्रमुख एसएसपी भीम ढकालले जानकारी दिए ।
उनी दुबईबाट फर्किएको प्रहरीले जनाएको छ ।
