झापा / दाङको तुलसीपुर उपमहानगरपालिका १८ दुधरासमा मोटरसाइकलसँग ठोक्किँदा हायश माइक्रो बसमा आगो लागेको छ । आगलागीमा परी एक जनाको मृत्यु भएको छ भने चार जना घाइते भएका छन् ।
घोराही-तुलसीपुर सडकखण्डमा पर्ने दुधरासस्थित सोनापुर मिनरल्स आयल्सको गेट नजिकै आइतबार राति करिब ९ बजे माइक्रो बस र मोटरसाइकल आपसमा ठोक्किएका थिए । त्यसपछि आगलागी हुँदा एक जनाको मृत्यु भएको इलाका प्रहरी कार्यालय तुलसीपुरले जनाएको छ ।
मृत्यु हुनेमा मोटरसाइकलमा सवार तुलसीपुर-१८ मोनिकापुरका २१ वर्षीय रेशम चौधरी रहेका छन् ।
त्यस्तै घाइते भएका मोटरसाइकल चालक तुलसीपुर-१८ का रमेश वली र हायस माइक्रोबस चालक २६ वर्षीय करण परियारलाई थप उपचारका लागि कोहलपुर मेडिकल कलेज लागिएको छ ।
त्यस्तै हायश चालकका भाइ तुलसीपुर-१८ का २४ वर्षीय कमल परियारको राप्ती प्रादेशिक अस्पतालमा उपचार भइरहेको छ । घाइते एक जना भने डिस्चार्ज भइसकेको प्रहरीले बताएको छ ।
