झापा / सर्लाहीको धनकौल गाउँपालिका-५ हरकठवास्थित एक बस्तीमा आगलागी हुँदा करिब रु २६ लाख बराबरको क्षति भएको छ । शनिबार साँझ भएको आगलागीमा परि १३ घर जलेर नष्ट भएका छन् ।
जिल्ला प्रहरी कार्यालय सर्लाहीका अनुसार आगलागीबाट स्थानीय प्रदीप हजारी, रामबली पासमान, ताहिर हजारी, शीतल हजारी, जीवन हजारी, भिखारी पासमान, रामविश्वास हजारी, बिकाउ पासमान, नन्नद किशोर पासमान, गगन हजारी, सरपलाल हजारी, रामनाथ हजारी र भुमेश्वर साह कानूको घर जलेर नष्ट भएको हो । आगलागीको कारण भने अझै खुल्न सकेको छैन ।
सर्लाहीका प्रहरी प्रवक्ता एवं प्रहरी नायब उपरीक्षक माधवप्रसाद बुढाथोकीका अनुसार आगलागीमा घरभित्र राखिएको ग्यास सिलिन्डर पड्किँदा स्थानीयवासी ३५ वर्षीय अरविन्दप्रसाद कुशवाह घाइते थिए । मलङ्गवा, हरिवन नगरपालिकाको वारुणयन्त्र तथा सुरक्षाकर्मी र स्थानीयवासीको सहयोगमा आगो नियन्त्रणमा आएको प्रहरीले जनाएको छ । आगलागीमा परि घरभित्र रहेका अन्न, लत्ताकपडालगायत सबै सामान जलेर १३ परिवारको बिचल्ली भएको हो ।
