कैलाली / कैलालीको मोहन्याल गाउँपालिका-१ मा श्रीमतीले आफ्नै श्रीमानको हत्या गरेकी छिन् । घरायसी विवादका क्रममा ३२ वर्षीया फूमा थापा मगरले ४३ वर्षीय श्रीमान नारायण थापामगरको हँसियाले हानेर हत्या गरेकी हुन् ।
आइतबार राति करिब १२ बजेको समयमा दुई जनाबीच विवाद हुँदा फूमाले हँसिया प्रहार गरि हत्या गरेको जिल्ला प्रहरी कार्यालय कैलालीका प्रवक्ता बेदप्रकाश जोशीले जानकारी दिएका छन् ।
प्रवक्ता जोशीका अनुसार सोमबार बिहान इलाका प्रहरी कार्यालय पण्डौनमा मैले श्रीमानको हत्या गरे भन्दै फूमा स्वयम् उपस्थित भएकी हुन् । घटनाको अनुसन्धानका लागि इलाका प्रहरी कार्यालय लम्कीबाट प्रहरी निरीक्षक लोकेन्द्र गुरुको नेतृत्वमा गएको प्रहरी टोलीले थप अनुसन्धान गरिरहेको छ ।
