झापा / भक्तपुरमा ट्रिपरको ठक्करबाट स्कुटर चालकको मृत्यु भएको छ भने, एक जना घाइते भएका छन् । मध्यपुर थिमी नगरपालिका-४ चारदोबाटो चोकमा ट्रिपरले स्कुटरलाई ठक्कर दिँदा स्कुटर चालक चाँगुनारायण बस्ने ३२ वर्षीय ज्ञानेन्द्र मल्ल ठकुरीको मृत्यु भएको हो ।
चारदोबाटो चोकमा नयाँ थिमीबाट कोरियन अस्पताल तर्फ जाँदै गरेको बा ४ ख ८५८१ नम्बरको ट्रिपरले गठ्ठाघरबाट नयाँथिमी तर्फ आउँदै गरेको बा प्र.०२–०२३ प ७७६९ नम्बरको स्कुटरलाई सोमबार राति ठक्कर दिएको थियो ।
दुर्घटनामा घाइते भएका उनको उपचारको क्रममा मध्यपुर ठिमी अस्पतालमा मृत्यु भएको प्रहरीले जनाएको छ ।
यस्तै, घाइते भएका स्कुटरमा पछाडि सवार म्याग्दी घर भई हाल चाँगुनारायण बस्ने ३३ वर्षीय विमल श्रेष्ठको सोही अस्पतालमा उपचार भइरहेको छ ।
दुवै सवारी साधन र ट्रिपर चालकलाई नियन्त्रणमा लिएको जिल्ला प्रहरी परिसर भक्तपुरका सूचना अधिकारी प्रहरी नायब उपरीक्षक राजु पाण्डेले जानकारी दिए ।
