काठमाडौं / आईजीपीमा धिरजप्रताप सिंहलाई गरिएको बढुवा विरुद्ध सर्वोच्चमा दायर गरिएको रिट मङ्गलबारको इजलासमा हेर्न नमिल्ने भएको छ ।
यसअघि दायर भएका डीआइजीको बढुवा विरुद्धको रिट निवेदनलाई पनि सँगै राखिएपछि हेर्न नमिल्ने भएको हो ।
तत्कालीन डीआइजी धिरज प्रताप सिंह, रवीन्द्र धानुकको एआईजीमा बढुवाविरुद्ध प्रकाशजंग कार्की, ईश्वरबाबु कार्की र घनश्याम अर्यालले रिट दायर गरेका थिए । सो रिट र अहिले पोखरेलले आईजीपी धिरजप्रताप सिंह विरुद्ध दायर गरेको रिट एकै इजलासमा राखिएपछि मुद्दा हेर्न नमिल्ने भएको हो ।
मंगलबार मुद्दाको सुनुवाइको पेशी सर्वोच्चका न्यायाधीश कुमार चुडाल र विश्वम्भर प्रसाद श्रेष्ठको संयुक्त इजलासमा तोकिएको थियो । वैशाख १८ मा वरिष्ठता मिचेर मन्त्रिपरिषद्ले सिंहलाई आईजीपी नियुक्त गरेको भन्दै प्रतिस्पर्धी एआईजी विश्वराज पोखरेलले सर्वोच्चमा रिट दायर गरेका थिए ।
आईजीपी नियुक्ति विवादमा सर्वोच्चले अन्तरिम आदेश दिन अस्वीकार गरेको थियो । साउन २० गतेबाट अनिवार्य अवकाशमा जाने भएकाले पोखरेलले इजलासमा आफ्नो मुद्दा छिटो टुंग्याइदिन आग्रह गरेका छन् ।
