बबरमहलस्थित नेपाल कला परिषद्मा ‘पञ्च तत्वहरूको पारस्परिकसम्बन्ध’ शीर्षकमा कला प्रदर्शनी भइरहेको छ ।
लिच्छवी हाउसको आयोजनामा गत शुक्रबारदेखि सुरू भएको प्रदर्शनीमा नौ जना नेपाली महिला कलाकारले आ–आफ्नो कलामार्फत् पृथ्वी, पानी, आगो, हावा र आकाशजस्ता जीवनका मौलिक तत्वहरूको गहिरो सम्बन्धलाई प्रस्तुत गरेको क्युरेटर मिसेल लामाले जानकारी दिनुभयो ।
उहाँले भन्नुभयो, “प्रदर्शनीले समकालीन जलवायु चेतना र सांस्कृतिक दृष्टिकोणलाई जोड्दै दर्शकलाई प्रकृतिप्रति साझा उत्तरदायित्वबारे सोच्न प्रेरित गर्छ । प्रत्येक कलाकारले आफ्नो अद्वितीय माध्यम र दृष्टिकोणबाट प्रस्तुत गर्नुभएको कलाले परम्परागत ज्ञान र समकालीन विषयवस्तुको संयोजन गरेको छ ।
प्रस्तुत प्रदर्शनी विशेषगरी नयाँ पुस्ताका लागि प्रेरणादायी र उपलब्धिमूलक हुने विश्वास लिएका छौँ ।”
क्युरेटर लामाका अनुसार यही असार २८ गतेसम्म चल्ने प्रदर्शनीमा नेपालका विविध भौगोलिक र सांस्कृतिक पृष्ठभूमिबाट प्रतिनिधित्व गर्ने कलाकारहरू सुष्मा शाक्य, बिधाता केसी, वर्षा मुखिया, रश्मी कर्ण, वैशाली क्षेत्री, अञ्जिला मानन्धर, मीना कायस्थ, सुशीला सिंह र तेन्जिन साङ्मोले पाँच तत्वहरूको आपसी निर्भरता र तिनको एकताले मानव जीवन र पर्यावरणमा पार्ने प्रभावलाई कलामा समेट्न कोसिस गर्नुभएको छ ।
प्रदर्शनीमा मिथिला चित्रकलालाई ‘पञ्चतत्व’को माध्यमले प्रस्तुत गर्नुभएकी कलाकार रश्मी कर्ण महिलालाई केन्द्रमा राखेर आयोजना गरिएको प्रदर्शनीले नयाँ आयामको सुरुआत गरेको बताउनुहुन्छ ।
“प्रदर्शनीमा परम्परा र समकालीन अभिव्यक्तिबीचको समिश्रण देखिएको छ । हामीले मिथिला चित्रकलालाई दिइएको विषयसँग जोडेर प्रस्तुत गरेका छौँ । प्रदर्शित कलाले नेपालको विविधताको सुन्दर पक्षलाई दर्शाउनुका साथै हाम्रो परम्परागत मान्यतालाई पनि प्रस्ट्याउछ”, उहाँले भन्नुभयो ।
आयोजकका अनुसार असार २८ गतेसम्म हरेक दिन बिहान ११ बजेदेखि साँझ ७ बजेसम्म कला प्रदर्शनी अवलोकन गर्न सकिने छ ।
