काठमाडौँ — पोखरामा कोरोना भाइरस संक्रमणबाट ७४ वर्षीया एक महिलाको मृत्यु भएको छ। गण्डकी प्रदेश स्वास्थ्य निर्देशनालयका निर्देशक खीमबहादुर खड्काले मृत्युको पुष्टि गरेका छन्।
खड्काका अनुसार ती महिला आठ दिनअघि कोरोना पोजिटिभ देखिएपछि उपचारका लागि अस्पतालमा भर्ना भएकी थिइन्। “उनी चरक अस्पतालमा उपचाररत थिइन्। उच्च रक्तचाप र मधुमेहसमेत भएको थाहा भएको छ,” खड्काले जानकारी दिए।
उनका अनुसार कोरोना संक्रमणसँगै अन्य स्वास्थ्य समस्या पनि देखिएकाले मृत्युको कारणमा विविधता हुन सक्ने भए पनि कोरोना पुष्टि भएको हो।
स्वास्थ्य निर्देशनालयका अनुसार गण्डकी प्रदेशमा हाल कोरोना संक्रमण दर फेरि बढ्न थालेको छ। हालसम्म प्रदेशभर ८ जना संक्रमित उपचाररत छन्, जसमा कास्कीमा ५, बागलुङमा २ र स्याङ्जामा १ जना रहेका छन्।
