काठमाडौं— मध्यपूर्वका लागि अमेरिकी विशेष दूत स्टिभ विटकोफ शुक्रबार गाजाको भ्रमणमा जाने भएका छन्। अमेरिकी राष्ट्रपति कार्यालय (ह्वाइट हाउस) की प्रेस सेक्रेटरी क्यारोलिन लेभिटका अनुसार इजरायलका लागि अमेरिकी राजदूत माइक हुकाबे पनि विटकोफसँगै गाजातर्फ लाग्नेछन्।
हाल इजरायलमै रहेका विटकोफले प्रधानमन्त्री बेन्जामिन नेतान्याहुसँग गरेका वार्तालाई ‘उपलब्धिमूलक’ रहेको बताएका छन्। गाजामा भइरहेको मानवीय संकटका बीच उनको यो भ्रमणलाई अन्तर्राष्ट्रिय समुदायले चासोका साथ हेरिरहेको छ।
यसैबीच गाजामा जारी हिंसात्मक द्वन्द्व अझै नरोकेको गाजाको स्वास्थ्य मन्त्रालयले जनाएको छ। मन्त्रालयका अनुसार पछिल्लो २४ घण्टामा कम्तीमा १११ जनाको मृत्यु भएको छ। तीमध्ये ९१ जना राहत सामग्री खोज्न निस्केका बेला मारिएका हुन्।
बुधबार उत्तरी गाजामा खाना लिन लाइनमा उभिएका नागरिकमाथि भएको आक्रमणमा ५० जनाको ज्यान गएको थियो भने ४०० भन्दा बढी घाइते भएका छन्। खाना लिएर आएको लरीपछि भिड लागेको अवस्थामा लक्षित हमला भएको स्थानीय स्रोतले जनाएका छन्।
इजरायली पक्षले भने बन्दी रिहाइ तथा युद्धविरामको पहलमा उल्लेखनीय प्रगति नभए थप कडा कारबाहीको चेतावनी दिएको छ। अमेरिकी पूर्वराष्ट्रपति डोनाल्ड ट्रम्पले सामाजिक सञ्जालमार्फत वक्तव्य दिँदै, “हमासले बन्दीहरू रिहा गरी आत्मसमर्पण नगरेसम्म रक्तपात रोकिँदैन,” भनेका छन्।
