बाजुरा— बाजुराको बडीमालिका नगरपालिका वडा.नम्बर ७ चुथीमा निर्माण भइरहेको १० शैया अस्पतालको काम हाल तीव्र गतिमा अगाडि बढिरहेको छ । हालसम्म निर्माण कार्यको करिब ८५ प्रतिशत प्रगति पूरा भइसकेको छ ।
स्वास्थ्य तथा जनसङ्ख्या मन्त्रालयले अघि सारेको ‘एक पालिका, एक अस्पताल’ योजनाअन्तर्गत निर्माण भइरहेको अस्पतालको ठेक्का सम्झौता २०७८ जेठ ५ मा करिब ८ करोड ८७ लाख २६ हजार २ सय १८ रुपैयाँ ६८ पैसामा राजेन्द्र डि.वि.जे.भी. निर्माण सेवासँग सम्झौता भएको थियो ।
नेपाल सरकार अर्थ तथा स्वास्थ्य तथा जनसंख्या मन्त्रालयको आर्थिक सहयोगमा निर्माण भइरहेको उक्त अस्पतालको कार्य अहिले धमाधम जारी छ । निर्माण सम्झौता भएको १८ महिना भित्र सम्पन्न गर्ने लक्ष्य राखिएको भए पनि निर्धारित समयसीमा नपुगेपछि आगामी चार महिना भित्र सम्पूर्ण कार्य सक्ने योजना निर्माण सेवाको छ ।
जग्गा विवादका कारण ठेक्का सम्झौता भएको करिब सात महिना पश्चात् काम सूचारु गरेर अहिले करिक ८५ प्रतिशत काम पूरा भएको राजेन्द्र डि.वि.जे.भी. निर्माण सेवाका प्रतिनिधि दिपक जैशीले बताए ।
उनका अनुसार बर्षातको समयमा सामान ढुवानीमा समस्या हुँदा ढिलाई भए पनि अबको करिब तिन महिना भित्र सम्पुर्ण काम सम्पन्न गरिसक्ने बताएका छन् ।
अस्पतालको झ्याल ढोका र कलरिङको कार्य बाँकी रहेको छ । २०७८ मा तत्कालिन प्रधानमन्त्री केपी शर्मा ओली नेतृत्वको सरकारले देशभरका ७ सय ५३ वटै स्थानीय तहमा १० शैया बराबर अस्पताल निर्माण गर्ने योजना बनाएको थियो ।
बाजुराका अन्य ६ वटा स्थानीय तहमा १० सैया अस्पताल निर्माण गर्न नसकिएको भए पनि जगन्नाथ गाउँपालिकामा निर्माण सम्पन्न भएर सञ्चालनमा आएको छ ।
