काठमाडौं— त्रिभुवन विश्वविद्यालयमा विभिन्न विद्यार्थी संगठनहरूको संयुक्त मोर्चाले मंगलबार प्रदर्शन गरेका छन्। विश्वविद्यालय परिसरमा भेला भएका विद्यार्थीहरूले शैक्षिक क्षेत्रसँग सम्बन्धित विभिन्न माग राख्दै नाराबाजी गरेका हुन्।
प्रदर्शनका क्रममा उनीहरूले “शैक्षिक संस्थामा हुने छात्रा हिंसा विरुद्ध एकजुट बनौँ”, “क्याम्पसहरू सुन पसल होइनन्”, “विश्वविद्यालयमा प्रहरी होइन, प्राध्यापक पठाऊ”, तथा “ओई सरकार, विद्यालय शिक्षा विधेयक खोई?” जस्ता नारा लेखिएका प्लेकार्ड र पम्पलेट बोकेका थिए।
विद्यार्थी नेताहरूले विश्वविद्यालय र क्याम्पसहरूमा बढ्दो असुरक्षा, विशेषगरी छात्रामाथि हुने हिंसाका घटनाप्रति चिन्ता व्यक्त गर्दै त्यसको अन्त्यका लागि प्रभावकारी कदम चाल्न सरकारसँग माग गरेका छन्। साथै, उनीहरूले शैक्षिक संस्थामा अनावश्यक रूपमा सुरक्षाकर्मी परिचालन गर्नुको सट्टा शैक्षिक गुणस्तर सुधारतर्फ ध्यान दिनुपर्ने बताएका छन्।
प्रदर्शन शान्तिपूर्ण रूपमा सम्पन्न भएको बताइएको छ। विद्यार्थी संगठनहरूले आफ्ना मागहरू सम्बोधन नभए थप कडा आन्दोलनका कार्यक्रम घोषणा गर्ने चेतावनी दिएका छन्।
