काठमाडौं— गृहमन्त्री सुधन गुरुङले साधारण भेषमा बारा–पर्सा सीमाक्षेत्रको आकस्मिक अनुगमन गरेका छन्। हाफ पाइन्ट र टिसर्ट लगाएर सीमामा पुगेका उनले स्थानीय बासिन्दा तथा व्यवसायीसँग प्रत्यक्ष भेटघाट गर्दै तस्करी, भन्सार छली र सुरक्षा अवस्थाबारे जानकारी लिएका हुन्।
गृह मन्त्रालयका अनुसार अनुगमनको उद्देश्य सीमाक्षेत्रको वास्तविक अवस्था बुझ्नु, स्थानीयको गुनासो सुन्नु तथा सम्बन्धित निकायबाट प्राप्त प्रतिवेदनसँग स्थलगत अवस्थाको तुलना गर्नु रहेको थियो।
अनुगमनपछि हालसम्म कुनै प्रहरी कर्मचारीमाथि कारबाही गरिएको वा जागिरबाट हटाइएको भन्ने आधिकारिक विवरण सार्वजनिक भएको छैन। त्यस्तै, तस्करीमा प्रहरीको संलग्नता वा कथित ‘सेटिङ’ सम्बन्धी आरोप पनि सम्बन्धित निकायबाट पुष्टि भइसकेको छैन।
सरकारले सीमाक्षेत्रमा हुने अवैध गतिविधि नियन्त्रण, सुशासन प्रवर्द्धन र कानुन कार्यान्वयनलाई प्रभावकारी बनाउन यस्ता आकस्मिक अनुगमनलाई निरन्तरता दिइने जनाएको छ।
