काठमाडौं । सुदूरपश्चिम प्रदेश सरकारमा सत्ता समीकरण नाटकीय रूपमा बदलिएको छ। मुख्यमन्त्री कमलबहादुर शाहले सरकारमा सहभागी नेकपा एमालेका मन्त्रीहरूलाई पदमुक्त गरेलगत्तै एमालेले सरकारलाई दिएको समर्थन फिर्ता लिने निर्णय गरेको हो।
बुधबार बसेको एमाले संसदीय दलको बैठकले अब कमलबहादुर शाह नेतृत्वको सरकारलाई साथ नदिने औपचारिक निर्णय गर्दै प्रदेशको राजनीतिक समीकरण नै उल्ट्याइदिएको छ।
मुख्यमन्त्री शाहको मन्त्री बर्खास्त गर्ने कदमपछि एमालेले त्यसलाई गठबन्धनको विश्वासमाथिको प्रहार भन्दै तत्काल समर्थन फिर्ता लिएको हो। यससँगै प्रदेश सरकारको बहुमत कायम रहने वा नरहने विषय चासोको केन्द्र बनेको छ।
एमालेको निर्णयपछि अब मुख्यमन्त्री शाहले प्रदेश सभामा विश्वासको मत लिनुपर्ने अवस्था आउन सक्ने देखिएको छ। यदि आवश्यक संख्या जुटाउन नसके सरकार संकटमा पर्न सक्छ भने सुदूरपश्चिममा नयाँ सत्ता समीकरण निर्माणको प्रयास पनि तीव्र हुने सम्भावना बढेको छ।
यस घटनाले सुदूरपश्चिमको राजनीति नयाँ मोडमा पुगेको छ। मन्त्री बर्खास्तीबाट सुरु भएको विवाद अब सरकारको अस्तित्वसँग जोडिएको राजनीतिक संघर्षमा रूपान्तरण भएको विश्लेषण भइरहेको छ।
