काठमाडौं । भोटेकोशी हुँदै त्रिशूली नदीमा आएको भीषण बाढीले नदी आसपासका सडक तथा पुलमा ठूलो क्षति पुर्याएको छ। प्रारम्भिक विवरणअनुसार बाढीका कारण कम्तीमा १९ वटा पुलमा क्षति पुगेको छ भने करिब ४० किलोमिटर सडक भत्किएको तथा विभिन्न स्थानमा सडक कटान भएको छ।
बाढीको तीव्र बहावले पुलका संरचना कमजोर बनाउनुका साथै कतिपय स्थानमा सडकको ठूलो भाग नै बगाएको छ। सडक तथा पुलमा भएको क्षतिका कारण त्रिशूली नदी करिडोरका विभिन्न क्षेत्रमा यातायात आवागमन प्रभावित भएको छ। यसले बाढी प्रभावित क्षेत्रमा उद्धार, राहत तथा अत्यावश्यक सामग्री पुर्याउने काममा समेत चुनौती थपिएको छ।
क्षतिग्रस्त सडकखण्डमा यातायात सञ्चालन पुनःस्थापित गर्न सडक विभागले डोजर, एक्स्काभेटरलगायत भारी उपकरण परिचालन गरेको छ। विभागका प्राविधिक टोलीले क्षतिग्रस्त सडक तथा पुलको अवस्था मूल्यांकन गर्दै तत्काल सडक खुलाउने काम अघि बढाएका छन्।
तर बाढीले कमजोर बनाएका पुल तथा सडकमा तत्काल सवारी सञ्चालन गर्दा थप जोखिम हुनसक्ने भएकाले प्राविधिक परीक्षणपछि मात्रै सुरक्षित आवागमन सञ्चालन गर्ने चुनौती रहेको छ। विशेषगरी नदी किनारका सडकखण्डमा थप कटानको जोखिमसमेत कायमै रहेको छ।
सडक विभागका अनुसार अहिले सार्वजनिक गरिएको क्षतिको विवरण प्रारम्भिक हो। बाढी प्रभावित सबै क्षेत्रमा स्थलगत मूल्यांकन पूरा नभइसकेकाले थप विवरण संकलन हुँदै जाँदा पुल तथा सडकमा भएको क्षतिको परिमाण अझ बढ्न सक्ने देखिएको छ।
भोटेकोशी–त्रिशूली बाढीले बस्ती, विद्युत् आयोजना र अन्य भौतिक संरचनासँगै यातायातको महत्वपूर्ण पूर्वाधारमा समेत ठूलो धक्का दिएको छ। अब सरकारसामु तत्कालको प्राथमिकता क्षतिग्रस्त सडक खुलाउने, जोखिमयुक्त पुलको प्राविधिक परीक्षण गर्ने र बाढी प्रभावित क्षेत्रमा सुरक्षित यातायात तथा राहत पहुँच सुनिश्चित गर्ने बनेको छ।
