काठमाडौं— शिक्षक महासंघले नेकपा माओवादी केन्द्रको पार्टी कार्यालय पेरिसडाँडामा धर्ना दिएका छन् । सरकारले आफूहरूसँग गरेको सहमति पूर्णरुपमा सम्बोधन नगरेको भन्दै महासंघले माओवादीको पार्टी कार्यालयमा धर्ना दिएको हो ।
महासंघका अध्यक्ष लक्ष्मीकिशोर सुवेदीले पहिलो चरणको आन्दोलनको कार्यक्रम अन्तर्गत आज माओवादीको पार्टी कार्यालयमा धर्ना दिएको जानकारी दिए । बुधबार नेपाली कांग्रेस र बिहीबार नेकपा एमालेको पार्टी कार्यालयमा धर्ना दिएको महासंघ आज माओवादी केन्द्रको पार्टी कार्यालयमा धर्ना दिन पुगेको हो ।
अध्यक्ष सुवेदीका अनुसार महासंघले दिउँसो १ बजे पार्टी कार्यालयमा ध्यानाकर्षण पत्र समेत बुझाउने छ । उनले भने,‘हामीले पहिलो चरणको आन्दोलनको कार्यक्रम अन्तर्गत आज यहाँ धर्ना दिएका हौँ । हामीले नेपाली कांग्रेसको कार्यालय, नेकपा एमालेको कार्यालयमा धर्ना दिएर ध्यानाकर्षण पत्र बुझाएका थियौँ । आज यहाँ धर्ना दिएका छौँ । सानो उपस्थिति छ यहाँ । १ बजे हामीले माओवादीको पार्टी कार्यालयमा ध्यानाकर्षण पत्र बुझाउने छौँ ।’
उनले सरकारले आफूहरूसँग गरेको सहमति पूर्णरुपमा सम्बोधन हुन नसकेकाले दबाव दिनका लागि राजनीतिक दलका कार्यालयमा धर्ना दिएको बताए । उनले २१ गतेदेखि दोस्रो चरण आन्दोलन कडा रुपमा सञ्चालन हुने पनि जानकारी दिए । ‘२१ गतेदेखि दोस्रो चरण आन्दोलन कडा रुपमा हुन्छ । अहिले दबाव दिइरहेका छौँ । विधेयकमा धेरै कुरा छुटेका छन् सुधार्नुपर्ने छ परिमार्जन गर्नुपर्ने छ ।’
