काठमाण्डौ । प्रभु ग्रुपका अध्यक्ष तथा नेकपा एमालेका पूर्वसांसद देवीप्रसाद भट्टचन पक्राउ परेका छन्। आर्थिक हिनामिनाको आरोपमा उनलाई नेपाल प्रहरीको केन्द्रीय अनुसन्धान ब्यूरो (सीआईबी) ले मंगलबार ललितपुरबाट पक्राउ गरेको हो।
प्रभु ग्रुपसँगै सम्बन्धित आर्थिक हिनामिनामा भट्टचनविरुद्ध यसअघि नै उजुरी समेत परेको थियो। उनी सहकारी ठगी प्रकरणमा समेत मुछिएका थिए। भट्टचनविरुद्ध ९८ करोड रुपैयाँ बढी ठगी गरेको आरोपमा जाहेरी परेको थियो।
सिआइबी स्रोतका अनुसार प्रभु ग्रुपसँग सम्बन्धित आर्थिक हिनामिनाको मुद्दामा मंगलबार उनलाई काठमाडौंस्थित निवासबाटै पक्राउ गरिएको हो । प्रभु रेमिटेन्स र प्रभु सहकारीका नाममा संकलित रकम समूहकै नेतृत्व तहबाट हिनामिना गरिएको उजुरी परेपछि अनुसन्धानका लागि भट्टचनलाई नियन्त्रणमा लिइएको बताइएको छ ।
भट्टचनमाथि प्रभु ग्रुपमार्फत संकलित करोडौं रुपैयाँ अनियमित रुपमा प्रयोग गरिएको आरोप छ । उक्त उजुरी प्रभु समूहकी पूर्व सञ्चालक कुसुम लामाले दर्ता गरेकी थिइन् । लामाले समूहका अध्यक्षसमेत रहेका भट्टचनले संस्थाको रकम निजी स्वार्थका लागि प्रयोग गरेको भन्दै कानुनी कारबाहीको माग गरेकी थिइन्। प्रभु म्यानेजमेन्टले देशभर चार सय सहकारीलाई एजेन्ट बनाउँदा धरौटी रकम लिएको थियो । तर , रेमिट्यान्सबापत सहकारीले भुक्तानी गरेको यो कम्पनीले सहकारीहरूको करिब १ अर्ब रकम फिर्ता नदिएको सीआईबीको अनुसन्धानबाट खुलेको छ।
प्रभु म्यानेजमेन्ट प्रालिले कम्तीमा पनि १६ वटा सहकारी संस्थाको रकम हिनामिना गरेको आरोपमा छानबिन भएको थियो। प्रभु म्यानेजमेन्टका तत्कालिन अध्यक्ष देवीप्रसाद भट्टचनले रकम हिनामिना गरेका थिए।
