काठमाडौं । फिफा विश्वकपअन्तर्गत समूह ‘एफ’ मा जापानले ट्युनिसियामाथि ४–० को प्रभावशाली जित निकाल्दै नकआउट चरणको सम्भावना बलियो बनाएको छ।
खेलको चौथो मिनेटमै डाइची कामाडाले गोल गर्दै जापानलाई अग्रता दिलाएका थिए। त्यसपछि आयुसे उएडाले ३१औँ र ८३औँ मिनेटमा दुई गोल थपे। जापानका लागि अर्को गोल जे आइटोले ६९औँ मिनेटमा गरेका थिए। पहिलो हाफमै दुई गोलको अग्रता बनाएको जापानले दोस्रो हाफमा थप दुई गोल गर्दै ट्युनिसियालाई खेलभर दबाबमा राख्यो।
यसअघि नेदरल्यान्ड्ससँग २–२ को बराबरी खेलेको जापानले दोस्रो खेलमा प्रभावशाली जित निकाल्दै दुई खेलबाट चार अंक जोडेको छ। समूह ‘एफ’ मा नेदरल्यान्ड्स, जापान र स्विडेनको समान चार–चार अंक भए पनि गोल अन्तरका आधारमा नेदरल्यान्ड्स शीर्ष स्थानमा रहेको छ।
उता, लगातार दोस्रो हार बेहोरेको ट्युनिसिया भने समूह चरणबाटै बाहिरिएको छ। पहिलो खेलमा स्विडेनसँग पराजित भएको ट्युनिसियाले जापानविरुद्ध पनि निराशाजनक प्रदर्शन गर्यो। जापानको यो जितले अन्तिम ३२ मा स्थान बनाउने सम्भावना बलियो बनेको छ भने समूहको अन्तिम खेल अझ प्रतिस्पर्धात्मक हुने देखिएको छ।
