काठमाडौं । संघीय संसद्अन्तर्गत प्रतिनिधिसभाको भोलि ९बिहीबार० बस्ने तय भएको बैठक अन्तिम समयमा स्थगित गरिएको छ। संसद् सचिवालयले सूचना जारी गर्दै बिहान ११ बजेका लागि बोलाइएको बैठक विशेष कारणवश सञ्चालन हुन नसक्ने जनाएको हो।
बैठक स्थगित भएसँगै पछिल्ला दिनहरूमा संसद्को नियमित कार्यसूची प्रभावित भइरहेका बेला राजनीतिक वृत्तमा नयाँ चर्चा सुरु भएको छ। सरकार र प्रमुख दलहरूबीच विभिन्न विषयमा जारी परामर्श, सदनको कार्यसूची तथा राजनीतिक सहमतिका प्रयासहरूबीच बैठक सारिएको हुनसक्ने अनुमानसमेत गरिएको छ, यद्यपि सचिवालयले स्थगनको स्पष्ट कारण खुलाएको छैन।
संसद्का महासचिव पद्मप्रसाद पाण्डेयद्वारा जारी सूचनाअनुसार अब प्रतिनिधिसभाको अर्को बैठक शुक्रबार दिउँसो १ बजे बस्नेछ।
संसद् बैठक स्थगित भएपछि सांसदहरूको प्रश्नोत्तर, विधेयकमाथिको छलफल तथा अन्य संसदीय कामकारबाही एक दिन पछाडि धकेलिएको छ। प्रतिपक्षी दलहरूले उठाइरहेका विभिन्न विषय र सरकारको जवाफदेहितासम्बन्धी बहस चलिरहेका बेला बैठक सारिनुलाई अर्थपूर्ण रूपमा हेरिएको छ।
लगातार अवरोध र स्थगनका कारण संसद्को प्रभावकारितामाथि प्रश्न उठिरहेका बेला अब शुक्रबारको बैठकमा राजनीतिक दलहरू कुन रणनीतिसहित प्रस्तुत हुन्छन् भन्ने चासो बढेको छ।
