काठमाडौं — प्रहरीको केन्द्रीय अनुसन्धान ब्युरो (CIB) को नियन्त्रणमा रहेका युनुस अन्सारीले उच्च अदालत पाटनमा बन्दी प्रत्यक्षीकरण (हाबियस कोर्पस) को रिट दायर गरेका छन्।
नक्कली नोट प्रकरणमा ६ वर्षको सजाय पूरा गरी जेठ १० गते नख्खु कारागारबाट रिहा भएका अन्सारीलाई CIB ले तत्कालै पुनः पक्राउ गरी हिरासतमा राखेको थियो। ब्युरोले उनीमाथि सम्पत्ति शुद्धीकरण (मनी लन्डरिङ) को अभियोगमा थप अनुसन्धान गरिरहेको जनाएको छ।
यसैबीच, अन्सारीले आफ्नो निरन्तर थुनालाई गैरकानुनी दाबी गर्दै शुक्रबार उच्च अदालत पाटनमा रिट दायर गरेका हुन्। उक्त रिटमाथि आइतबार न्यायाधीश दुर्गाप्रसाद ढुंगेलको इजलासमा सुनुवाइ हुने बताइएको छ।
युनुस अन्सारीलाई २०७६ सालमा त्रिभुवन अन्तर्राष्ट्रिय विमानस्थलबाट ७ करोड ६७ लाख ९४ हजार नक्कली भारतीय रुपैयाँसहित पक्राउ गरिएको थियो। उनी कतारबाट आएका तीन पाकिस्तानी नागरिकलाई लिन गएका बेला पक्राउ परेका थिए।
उक्त प्रकरणभन्दा पहिला पनि उनी नक्कली नोट काण्डमा नै समातिएका थिए। त्यो बेला अन्सारीमाथि कारागारभित्रै गोली प्रहार भएको थियो, जसमा उनी गम्भीर घाइते भएका थिए तर बाँच्न सफल भएका थिए।
