काठमाडौं । भोटेकोशी–त्रिशूली बाढीले ठूलो जनधनको क्षति पुर्याएपछि राजनीतिक दलहरू पनि राहत तथा उद्धारमा आर्थिक सहयोग जुटाउन सक्रिय भएका छन्। प्रमुख दलहरूले प्रधानमन्त्री राहत कोषमा नगद सहयोग घोषणा गर्दै प्रभावितका लागि राहत सामग्री पठाउने तयारी गरेका छन्।
नेपाली कांग्रेसले १ करोड रुपैयाँ, राष्ट्रिय स्वतन्त्र पार्टी (रास्वपा)ले ५० लाख, नेपाली कम्युनिस्ट पार्टी (नेकपा)ले २५ लाख, नेकपा एमालेका बागमती र राजधानी प्रदेश कमिटीले २० लाख तथा श्रम संस्कृति पार्टीले १५ लाख रुपैयाँ सहयोग घोषणा गरेका छन्।
नेकपाले नगद सहयोगसँगै आवश्यक राहत सामग्री प्रभावित जिल्लामा पठाउने निर्णय गरेको छ। एमालेले पनि आफ्ना विभिन्न तहका कमिटीबाट सहयोग संकलन गरी पार्टीका तर्फबाट एकमुष्ट रकम उपलब्ध गराउने तयारी गरेको जनाएको छ। उज्यालो नेपाल, राप्रपा तथा विभिन्न मधेस केन्द्रित दलहरूले समेत राहतका लागि सहयोग गर्ने तयारी गरिरहेका छन्।
भोटेकोशी हुँदै त्रिशूली नदीमा आएको बाढीबाट रसुवा, नुवाकोट, धादिङ, गोरखा र तनहुँलगायतका जिल्ला प्रभावित भएका छन्। पछिल्लो विवरणअनुसार बाढीमा ९ सयभन्दा बढीको मृत्यु पुष्टि भइसकेको छ भने ४ हजारभन्दा बढी सम्पर्कविहीन छन्। हजारौँ नागरिक विस्थापित भएका छन्।
विपद्को यस्तो संकटमा राजनीतिक मतभेदभन्दा माथि उठेर दलहरू राहत अभियानमा जोडिन थालेका छन्। अब घोषणा गरिएको सहयोग पीडितसम्म कति छिटो र प्रभावकारी रूपमा पुग्छ भन्ने विषय मुख्य चुनौती बनेको छ।
