दाङ — आफ्नै १८ वर्षीया छोरीलाई बलात्कार गरेको आरोपमा दाङ प्रहरीले एक पुरुषलाई पक्राउ गरेको छ।
जिल्ला प्रहरी कार्यालय दाङका प्रवक्ता डिएसपी चक्रबहादुर शाहका अनुसार, असार ३० गते राति भएको भनिएको घटनाको उजुरीका आधारमा साउन ३ गते आरोपीलाई घरबाटै पक्राउ गरिएको हो।
पीडितका परिवारजनले प्रहरीमा उजुरी दिएका थिए। प्रारम्भिक अनुसन्धानअनुसार, घटनाका बेला पीडितकी आमा र भाइ भारतमा रोजगारीमा थिए।
पीडितको गोपनीयतालाई ध्यानमा राख्दै प्रहरीले आरोपीको नाम र ठेगाना सार्वजनिक गरेको छैन। घटनाबारे थप अनुसन्धान भइरहेको प्रहरीले जनाएको छ।
