अछाम— अछामको पञ्चदेवल विनायक नगरपालिका–८ स्थित छाउगोठमा सुतिरहेका दुई जनाको भीरबाट खसेको ढुङ्गाले किचेर मृत्यु भएको छ। एक जना घाइते भएकी छन्।
३५ वर्षीया निम खनाल र मङ्गलसेन नगरपालिका–६ की सात वर्षीया कविता भण्डारीको घटनास्थलमै मृत्यु भएको जिल्ला प्रहरी कार्यालय अछामले जनाएको छ । उनीहरू छाउपडी प्रथाका कारण गोठमा सुतिरहेका बेला अचानक ढुङ्गा खसेको जनाइएको छ।
कविताकी आमा भने घाइते भएकी छन्। उनलाई तत्कालै नजिकको स्वास्थ्यचौकीमा उपचारका लागि पठाइएको प्रहरीले जनाएको छ।
घटनाको जानकारीपछि प्रहरी निरीक्षक टेकबहादुर देउवाको नेतृत्वमा प्रहरी टोली घटनास्थलतर्फ प्रस्थान गरेको जिल्ला प्रहरी प्रमुख ओमप्रकाश खनालले जानकारी दिए।
