काठमाडौं— मानव बेचबिखनविरुद्धको १९औं राष्ट्रिय दिवसको अवसरमा आज काठमाडौंमा “मानव बेचबिखनको सवालमा सञ्चार क्षेत्रको भूमिका” विषयक अन्तरक्रिया कार्यक्रम हुँदैछ। कार्यक्रम शक्ति समूह र कियाशील पत्रकार महिला (डब्लु डब्लु जे) को संयुक्त आयोजनामा नयाँ बानेश्वरस्थित इन्द्रेणी कम्प्लेक्समा दिउँसो २ बजेदेखि ६ बजेसम्म सञ्चालन हुने छ।
मानव बेचबिखनको जोखिममा परेका महिला, बालिका र किशोरीहरूको पक्षमा लामो समयदेखि काम गर्दै आएको शक्ति समूहले सञ्चार माध्यमहरूको प्रभाव र उत्तरदायित्वलाई ध्यानमा राख्दै कार्यक्रम आयोजना गरेको जनाएको छ।
शक्ति समूहका रणनीतिक तथा पैरवी निर्देशक चरिमाया तामाङले जारी गरेको सूचनामा, कार्यक्रमले मानव बेचबिखनविरुद्ध सञ्चार क्षेत्रको भूमिका अझ प्रभावकारी बनाउन विचार आदान–प्रदानको अवसर प्रदान गर्ने विश्वास व्यक्त गरिएको छ।
उक्त कार्यक्रममा सञ्चारकर्मी, पत्रकार, मानव अधिकारकर्मी र सरोकारवाला निकायका प्रतिनिधिहरूको सहभागिता रहनेछ।
