काठमाडौं— रोजगार अनुमति प्रणाली (इपिएस) अन्तर्गत भाषा तथा सीप परीक्षा पास गरे पनि लामो समयसम्म दक्षिण कोरिया जान नपाएको भन्दै युवाहरूले काठमाडौंमा प्रदर्शन गरेका छन्।
मंगलबार माइतीघरमा भेला भएका युवाहरूले रोस्टरको अवधि बढाउनुपर्ने र भाषा पास गरेपछि रोजगारीको सुनिश्चितता हुनुपर्ने माग राखेका छन्। उनीहरूका अनुसार भाषा परीक्षा उत्तीर्ण गरेर रोस्टरमा नाम बसेको वर्ष दिनभन्दा बढी भइसक्दा पनि रोजगारदाताको छनोटमा नपर्दा भविष्य अनिश्चित बनेको छ ।
इपिएस प्रणालीअनुसार भाषा तथा सीप परीक्षा पास गरेपछि मात्र कोरिया जान पाइँदैन । रोजगारदाताले छनोट गरेपछि मात्रै जान पाइने व्यवस्था छ । तर दुई वर्षसम्म पनि छनोटमा नपरे रोस्टरबाट नाम हट्ने र फेरि भाषा परीक्षा दिनुपर्ने बाध्यता रहेको युवाहरूको गुनासो छ ।
प्रदर्शनकारीहरूले विशेष गरी कृषि र पानीजहाज निर्माण क्षेत्रमा पास भएकाहरू धेरैजसो छनोटमा नपरेको बताएका छन्। यसअघि उनीहरूले ग्वार्कोस्थित इपिएस कार्यालयमा पनि विरोध प्रदर्शन गरेका थिए ।
दक्षिण कोरियाले सन् २००८ देखि इपिएस प्रणालीमार्फत नेपाली युवालाई रोजगारीमा लैजाँदै आएको छ । हालसम्म एक लाखभन्दा बढी नेपाली युवा यस प्रणालीमार्फत कोरिया पुगेका छन्।
सन् २०२५ का लागि कोरियाले झण्डै पाँच हजारकोटा निर्धारण गरे पनि एक लाखभन्दा बढी युवाले आवेदन दिएका छन्। हाल भाषा उत्तीर्ण गरेर रोस्टरमा मात्रै १२ हजारभन्दा बढी युवाको नाम रहेको इपिएस शाखाले जनाएको छ ।
शाखाले भने पटक–पटक हुने आन्दोलन र धर्नाले प्रक्रियामा नकारात्मक असर परेको भन्दै संयमित हुन आग्रह गरेको छ ।
