लुम्बिन। बुटवलमा सञ्चालित सिद्धार्थ बाल तथा महिला (आम्दा) अस्पतालले एक दशकमा झण्डै नौ लाख बढीलाई स्वास्थ्य सेवा प्रदान गरेको छ । अस्पतालले १० वर्षको अवधिमा बहिरङ्ग सेवा (ओपिडी), आकस्मिक सेवा तर्फ, अस्पतालमा भर्ना(इन्डोर) तर्फ र प्रसूति सेवा लिने गरी नौ लाख २६ हजार ४६२ जनाले सेवा लिएको अस्पतालले जनाएको छ ।
अस्पतालमा १० वर्षको अवधिमा बहिरङ्ग सेवा (ओपिडी) तर्फ तीन लाख ९५ हजार ६८२, आकस्मिक सेवा तर्फ दुई लाख ६३ हजार ६९५ जना, अस्पतालमा भर्ना(इन्डोर) तर्फ दुई लाख दुई हजार ८४७ जना, प्रसूति गराउने ४६ हजार दुई सय ३८ जनाले सेवा लिएको अस्पतालले जनाएको छ ।
गुणस्तरीय मातृ शिशु सेवा प्रदान गर्ने उद्देश्यका साथ बुटवलमा स्थापना भएको आम्दा नेपाल सिद्धार्थ बाल तथा महिला अस्पतालले २७ वर्ष पूरा गरेको अवसरमा आइतबार बुटवलमा आयोजित कार्यक्रममा मेडिकल सुपरिटेन्डेन्ट डा विनोद पराजुलीले जानकारी दिनुभयो ।
उहाँले काठमाडौँ बाहिर पहिलो बाल तथा महिला अस्पतालका रूपमा स्थापना भएको पहिलो पाँच वर्ष च्यारिटि अस्पतालका रूपमा सञ्चालनमा आएको बताउनुभयो ।सुरुवातमा ५० शय्याबाट सुरु भएको अस्पताल अहिले १०० शय्याको स्वीकृति भएको तर डेढ सय बढी सेवा दिँदै आएको उहाँले बताउनुभयो ।
अस्पतालमा बहिरङ्ग(ओपिडी), पिडियोटिक, पिडियोटिक सर्जरी, जेनेरेल, गाईनोक्लोजिस्ट, एनआईसियु, पिआईसियु, एचडियुलगायतका सेवा दिँदै आएको छ । अस्पतालमा महिलाको पाठेघर क्यान्सर, थालासेमिया रोग परीक्षण र उपचारसमेत हुदै आएको छ ।
आम्दा स्वास्थ्य विज्ञान प्रतिष्ठानमार्फत दक्षजनशक्ति उत्पादनमासमेत योगदान दिँदै आएको छ । अस्पतालमा २५ बढी विभागीय प्रमुख छन् । अध्ययन र रिसर्चमा जोड दिँदै आएको छ । अस्पतालमा ३९० घण्टाको सर्ट टम केयर गियरको तालिमसमेत हुदै आएको छ । लुम्बिनी प्रदेशका गुल्मी, प्यूठान, अर्घाखाँचीसहित भारतबाट समेत १० प्रतिशत भन्दा बढी सेवा लिने गरेका छन् ।
स्थापना दिवसको अवसरमा आज नयाँ शैक्षिक भवन उद्घाटन कार्यक्रममा बुटवल उपमहानगरपालिका, बुटवल उद्योग वाणिज्य सङ्घ र आम्दा नेपालको त्रिपक्षीय सहकार्यमा सञ्चालनमा रहेको अस्पतालमा फार्मेसी, हेल्थ एसिस्टेन्स र नर्सिङ गरी तीन विषय अध्ययन हुने तीन कोठे शैक्षिक भवनको उद्घाटन गरिएको हो ।
जापानीज नागरिक तथा आम्दाका पूर्व कर्मचारीसमेत रहेका सुन्सुके सुजुकीको समन्वयमा आम्दा हेगो, आम्दा माईन्सको करिब रु ३२ लाख सहयोगमा तीन कोठा भवन निर्माण गरिएको हो । बुटवल उपमहानगरपालिकाका नगरप्रमुख खेलराज पाण्डेयले बुटवल उपमहानगरपालिकाको पहलमा तीन सय शय्याको रूपमा विस्तार गर्ने गरी डिपिआर तयारीको काम अघि बढेको बताउनुभयो ।
कार्यक्रममा आम्दा माईन्सका अध्यक्ष सुन्सुके सुजुकीले यस क्षेत्रमा रहेको स्वास्थ्य सेवाको न्यून पहुँचलाई मध्यनजर गरी जापानीज नागरिक र सरकारको सहयोगमा अस्पताल निमार्ण भएको बताउनुभयो । अस्पतालबाट महिला र बच्चाको समानुपातिक रूपमा सेवा दिने भनिए पनि तथ्याङ्कमा भने बालबालिकाले बढी सेवा लिने देखिएको अस्पताल व्यवस्थापन समितिका उपाध्यक्ष बुटवल उद्योग वाणिज्य सङ्घका अध्यक्ष हरि अर्यालले बताउनुभयो ।
