काठमाडौं— फागुन २१ को निर्वाचनबाट निर्वाचित प्रतिनिधिसभा सदस्यहरू शपथ ग्रहणका लागि सिंहदरबारतर्फ जुट्न थालेका छन्। दिउँसो २ बजे तय गरिएको कार्यक्रमका लागि बिहानैदेखि सांसदहरूको आवागमन तीव्र बनेको छ।
यसपटक प्रत्यक्षतर्फ १६५ र समानुपातिकतर्फ ११० गरी कुल २७५ जना सांसद निर्वाचित भएका छन्। ज्येष्ठ सदस्य अर्जुननरसिंह केसीले राष्ट्रपतिबाट यसअघि नै शपथ लिइसकेका छन् र आज बाँकी सदस्यहरूलाई उनले नै पद तथा गोपनीयताको शपथ गराउनेछन्।
संवैधानिक व्यवस्था अनुसार सभामुख र उपसभामुख चयन नभएसम्म सभाको अध्यक्षता ज्येष्ठ सदस्यले गर्ने प्रावधान छ, जसअनुसार आजको शपथ प्रक्रिया अघि बढ्न लागेको हो।
भदौ २३–२४ को जेनजी विद्रोहका क्रममा साविकको संसद् भवन (अन्तर्राष्ट्रिय सम्मेलन केन्द्र) आगजनीमा क्षतिग्रस्त भएपछि सिंहदरबारभित्र निर्माणाधीन नयाँ भवनमै यो ऐतिहासिक शपथ कार्यक्रम आयोजना गर्न लागिएको हो।
यससँगै, नयाँ जनादेश पाएका प्रतिनिधिहरूले औपचारिक रूपमा संसदीय यात्राको सुरुवात गर्नेछन्।
