संखुवासभा— जिल्लाको विकट सिलीचोङ गाउँपालिकाले अब आपत्कालीन स्वास्थ्य सेवामा ठूलो राहत पाउने भएको छ। गुँरास हाइड्रोपावर कम्पनीले गाउँपालिकालाई एक एम्बुलेन्स उपलब्ध गराएको हो, जसले स्थानीय बासिन्दाको स्वास्थ्य सेवा पहुँचमा महत्वपूर्ण सुधार ल्याउने अपेक्षा गरिएको छ।
काठमाडौंको धोबीघाटस्थित कम्पनीको केन्द्रीय कार्यालयमा आयोजित कार्यक्रममा कम्पनीका अध्यक्ष शिव प्रसाद घिमिरेले गाउँपालिका अध्यक्ष भुपालराज मेवाहाङलाई एम्बुलेन्सको साँचो र आवश्यक कागजात हस्तान्तरण गरे।
अध्यक्ष घिमिरेले दुर्गम क्षेत्रका बिरामीहरूले समयमै उपचार नपाउँदा ज्यान गुमाउनुपर्ने अवस्थालाई कम गर्ने उद्देश्यले एम्बुलेन्स प्रदान गरिएको बताए। उनका अनुसार, “उपचारको अभावमा कसैले ज्यान गुमाउनु नपरोस् भन्ने हाम्रो मुख्य लक्ष्य हो।”
गाउँपालिका अध्यक्ष मेवाहाङले एम्बुलेन्सले स्थानीयवासीको जीवनरक्षामा ठोस योगदान पुर्याउने विश्वास व्यक्त गरे। उनले अब आपत्कालीन अवस्थामा बिरामीलाई छिटो र सुरक्षित रूपमा स्वास्थ्य संस्थासम्म पुर्याउन सहज हुने बताए।
सडक सञ्जाल कमजोर र भौगोलिक रूपमा कठिन रहेको सिलीचोङमा स्वास्थ्य सेवा पहुँच लामो समयदेखि चुनौतीपूर्ण रहँदै आएको छ। यस्तो अवस्थामा एम्बुलेन्स प्राप्त हुनु स्थानीयका लागि महत्वपूर्ण उपलब्धि मानिएको छ।
कार्यक्रममा वडा नम्बर १ देखि ५ सम्मका अध्यक्षहरूको पनि उपस्थिति रहेको थियो, जसले यस पहललाई स्वागत गरेका थिए।
