एजेन्सी। भेनेजुएलामा गएको शक्तिशाली दोहोरो भूकम्पले देशभर त्रास र विनाश फैलाएको छ ।राजधानी काराकासका विभिन्न स्थानमा बहुमञ्जिले भवनहरू भत्किएका छन् । सडकहरू भग्नावशेषले भरिएका छन् भने हजारौँ नागरिक सुरक्षित आश्रयको खोजीमा खुला स्थानमा बस्न बाध्य भएका छन् ।
कार्यवाहक राष्ट्रपति डेल्सी रोड्रिगेजले देशभर आपत्कालीन अवस्था घोषणा गर्दै काराकासस्थित सिमोन बोलिभार अन्तर्राष्ट्रिय विमानस्थलसमेत क्षतिग्रस्त भएकाले बन्द गरिएको जानकारी दिएकी छन् ।
भूकम्प गएको पाँच घण्टाभन्दा बढी समय बितिसक्दा पनि मृतक र घाइतेको यकिन संख्या सार्वजनिक हुन सकेको छैन । तर अमेरिकी भूगर्भीय सर्वेक्षण यूएसजीएसले आफ्नो ‘पेजर’ प्रणालीमार्फत सम्भावित मृतक संख्या १० हजारदेखि एक लाखसम्म पुग्न सक्ने प्रारम्भिक अनुमान सार्वजनिक गरेको छ ।
विशेषज्ञहरूका अनुसार यो अनुमान भूकम्पको तीव्रता, प्रभावित क्षेत्रको जनघनत्व, भवनहरूको अवस्था र विगतका भूकम्पीय तथ्यांकको आधारमा तयार गरिएको हो । तर वास्तविक क्षतिको तस्वीर उद्धार कार्य अगाडि बढ्दै जाँदा मात्र स्पष्ट हुने बताइएको छ । भूकम्पका धक्का छिमेकी ब्राजिल र कोलम्बियासम्म महसुस गरिएको छ । प्रभावित क्षेत्रमा लगातार पराकम्प आइरहेकाले सरकारले नागरिकहरूलाई घरभित्र नफर्किन आग्रह गरेको छ ।
गृहमन्त्री डियोस्दादो काबेलोले सर्वसाधारणलाई भवन, बिजुलीका पोल र ठूला संरचनाबाट टाढा रहन चेतावनी दिएका छन् । उद्धार टोलीहरू भग्नावशेषमा पुरिएका मानिसहरूको खोजीमा खटिएका छन् । चाकाओ नगरपालिकाका मेयर गुस्ताभो डुकेका अनुसार हालसम्म १८ जनाको जीवित उद्धार गरिएको छ भने कम्तीमा चारवटा भवन पूर्ण रूपमा भत्किएका छन् । पाँच सयभन्दा बढी उद्धारकर्मी खोज तथा उद्धार अभियानमा सक्रिय छन् ।
उता अमेरिकासहित इक्वेडर र पनामाले भेनेजुएलालाई मानवीय सहायता तथा उद्धार टोली पठाउने घोषणा गरेका छन् । अन्तर्राष्ट्रिय समुदायको ध्यान अहिले भेनेजुएलाको संकटतर्फ केन्द्रित भएको छ ।
भूकम्पपछिको वास्तविक क्षतिको पूर्ण विवरण अझै आउन बाँकी छ । तर प्रारम्भिक दृश्यहरूले भेनेजुएलाले पछिल्ला वर्षकै सबैभन्दा ठूलो प्राकृतिक विपत्ति सामना गरिरहेको संकेत दिएका छन् । उद्धारकर्मीहरू समयसँग दौडिरहेका छन् भने लाखौँ नागरिक अझै पराकम्पको त्रासमा रात काटिरहेका छन् ।
