झापा / नेपाली कांग्रेसको १४ औं महाधिवेशन अन्तर्गत हुने प्रदेश नं १ को अधिवेशनमा झापाका उद्धव थापाले सभापतिमा उमेदवारीमा दिने घोषणा गरेका छन् ।
पार्टी सभापति शेरबहादुर देउवा र कांग्रेस केन्द्रीय सदस्य कृष्णप्रसाद सिटौलाको समूहबाट थापाले उमेदवारीमा दिने तय भएको हो । उनले प्रदेशमा चुनावी अभियानसमेत शुरु गरिसकेका छन् ।
नेपाली कांग्रेसलाई बदलिँदो परिवेशमा अझ सशक्त बनाउन अनि लोकतान्त्रिक मूल्य मान्यतालाई दर्बिलो पार्ने अभियानलाई जोड दिन आफूले उमेदवारीमा दिन लागेको थापाले बताएका छन् ।
वि. सं. २०३४ सालदेखि काठमाडौंको शंकरदेव क्याम्पसबाट नेविसङ्घको इकाईबाट राजनीतिक जीवन शुरु गरेका थापा २०३५ सालको जनमत सङ्ग्रहमा निरंकुश पञ्चायती व्यवस्थाविरुद्ध बहुदलीय ब्यवस्था स्थापनका लागि बहुदलको प्रचार अभियानमा सक्रिय थिए । उनले विपी कोइरालाको सुरक्षा दस्तामा समेत रहेर काम गरेका थिए ।
कांग्रेसको झापा अर्जुनधारा गाउँसमितिको सचिव, सभापति हुँदै उनले झापा २ नं निर्वाचन क्षेत्रको क्षेत्रीय सभापति, जिल्ला सचिव, जिल्ला उपसभापति र दुई कार्यकाल जिल्ला सभापतिको जिम्मेवारी पुरा गरिसकेका छन् ।
प्रदेशमा कांग्रेसको भूमिका अझ स्पष्ट रुपमा अघि बढाउन र लोकतान्त्रिक शक्तिबीच सन्तुलन कायम गरी संघीय गणतन्त्र संस्थागत गर्न आफूले अझ भूमिका निर्वाह गर्ने थापा बताउँछन् । कांग्रेस प्रदेश १ को चुनाव यही शनिबार प्रदेश राजधानी विराटनगरमा हुँदैछ ।
