काठमाडौं— माओवादी केन्द्र र नेकपा (एकीकृत समाजवादी) का शीर्ष नेताहरूबीच सोमबार सिंहदरबारमा समसामयिक राजनीतिक विषयमा महत्वपूर्ण छलफल भएको छ।
माओवादी केन्द्र संसदीय दलको कार्यालयमा भएको छलफलमा माओवादी केन्द्रका वरिष्ठ उपाध्यक्ष नारायणकाजी श्रेष्ठ, महासचिव देव गुरुङ, र उपमहासचिव वर्षमान पुन सहभागी थिए। त्यस्तै, एकीकृत समाजवादी पार्टीबाट अध्यक्ष माधवकुमार नेपालसहित वरिष्ठ नेता डा. बेदुराम भुसाल पनि उपस्थित थिए।
प्रधानमन्त्री एवं माओवादी केन्द्रका अध्यक्ष पुष्पकमल दाहाल ‘प्रचण्ड’को सचिवालयका अनुसार छलफलमा समसामयिक राजनीतिक अवस्था, सत्तारूढ गठबन्धनको आगामी रणनीति तथा संसदमा देखिएका मुद्दाहरूबारे गहिरो विचार–विमर्श भएको छ।
छलफलबाट दुबै पक्षले सहकार्यलाई अझ सुदृढ बनाउँदै अगाडि बढ्ने प्रतिबद्धता व्यक्त गरेको बताइएको छ।
