काठमाडौं— अभिनेता, गायक र संगीतकार ऋषभ टण्डनको आज बिहान हृदयघातका कारण निधन भएको छ। उनको परिवारले यो खबरको पुष्टि गरेको छ र यस दुःखद घडीमा गोपनीयता (प्राइभेसी)को आग्रह गरेको छ।
रिपोर्ट अनुसार, ऋषभ टण्डन आफ्नी पत्नी ओलेस्या (जो उज्बेकिस्तानकी हुन्) सँग मुम्बईमा बस्दै आएका थिए। दिपावलीको अवसरमा उनी आफ्नो परिवारसँग उत्सव मनाउन दिल्ली गएका थिए, जहाँ आज बिहान उनलाई हृदयघात भयो। उनको अन्त्येष्टि आजै दिल्लीमा सम्पन्न हुनेछ।
ऋषभले गत अक्टोबर १० मा पत्नी ओलेस्यासँग आफ्नो जन्मदिन मनाएका थिए। ओलेस्याले त्यसको अवसरमा एउटा पोस्ट पनि शेयर गरेकी थिइन्। त्यसको भोलिपल्ट, अक्टोबर ११ मा, ऋषभले करवाचौथका तस्वीरहरू आफ्नो आधिकारिक सामाजिक सञ्जालमा पोस्ट गरेका थिए।
इन्डिया टुडे सँगको कुराकानीमा ऋषभको परिवारले यस कठिन समयमा गोपनीयता कायम राखिदिन अनुरोध गरेको छ।
संगीत क्षेत्रमा ऋषभ टण्डन ‘फकीर’ नामले प्रसिद्ध थिए। उनका धेरै गीतहरू ‘फकीर’ शब्दसहित रिलिज भएका छन्, जस्तै, फकीर की जुबानी, फकीरन र इश्क फकीराना।
सारा खानसँगको सम्बन्धका कारण चर्चामा
एक समयमा ऋषभ टण्डनको नाम अभिनेत्री सारा खानसँग जोडिएको थियो। उनीहरूको एक तस्बिर भाइरल भएपछि विवाहको चर्चा सुरु भएको थियो, जसमा सारा खान सिन्दूर लगाएर ऋषभसँग पोज दिँदै देखिएकी थिइन्। त्यसपछि सारा खानले स्पष्ट पार्दै भनिन् कि त्यो तस्बिर उनको सेटको थियो।
डेली भास्करसँगको अन्तर्वार्तामा साराले भनिन्, “त्यो दिन म फोटोशूटबाट फर्किएकी थिएँ। मैले लुगा फेरेकी थिएँ, तर दुर्भाग्यवश फोटोशूटका लागि लगाएको सिन्दूर मेटाउन बिर्सें। मैले र ऋषभले तस्वीर खिच्यौं, र ध्यान नै दिइएन कि सिन्दूर अझै मेरो निधारमा थियो। त्यसपछि म दुबईमा थिएँ, जब मेरो ‘विवाहको खबर’ सम्बन्धी फोनहरू आउन थाले। यो वाकई झस्काउने कुरा थियो।”
विवाहको चर्चापछि केही समयमै सारा र ऋषभबीच ब्रेकअप भएको थियो।
ऋषभ टण्डनले टी–सिरीजको म्युजिक एल्बम फिर से वही बाट आफ्नो संगीत करियर सुरु गरेका थिए। त्यसपछि उनले ये आशिकी, चाँद तू, धू धू करके जस्ता चर्चित गीतहरू दिएका थिए।
