काठमाडौं । चितवनमा जारी राष्ट्रिय स्वतन्त्र पार्टी (रास्वपा) को महाधिवेशनमा केन्द्रीय सदस्य पदका लागि ४०० भन्दा बढी उम्मेदवारी परेपछि प्रतिस्पर्धा अत्यन्त रोचक बनेको छ। सभापतिमा रवि लामिछाने निर्विरोध भए पनि केन्द्रीय सदस्यमा भने आकांक्षीहरूको ठूलो भीड देखिएको हो।
निर्वाचन आयोगका अनुसार उम्मेदवारी रुजुपछि प्रारम्भिक नामावली सार्वजनिक गरिनेछ। दाबी–विरोधको प्रक्रिया पूरा भएपछि अन्तिम उम्मेदवार सूची प्रकाशन हुनेछ र त्यसपछि मतदान सुरु हुनेछ।
रास्वपाले यसपटक दुई चरणमा निर्वाचन गर्ने व्यवस्था गरेको छ। पहिलो चरणमा सभापति र केन्द्रीय सदस्यको मतदान हुनेछ भने केन्द्रीय सदस्यको नतिजापछि मात्रै पदाधिकारी चयनका लागि दोस्रो चरणको चुनावी तालिका सार्वजनिक गरिनेछ।
नयाँ राजनीतिक शक्तिको रूपमा उदाएको रास्वपाभित्र नेतृत्वभन्दा संगठनमा स्थान सुरक्षित गर्ने प्रतिस्पर्धा तीव्र देखिएको छ, जसले महाधिवेशनलाई थप चासोको केन्द्र बनाएको छ।
