बिर्तामोड / झापाको अर्जुनधारा नगरपालिका –५ का ९ वर्षीय बालक आकाश चौधरी यतिबेला साङ्लोमा बाँधिएर बाल्यकाल बिताइ रहेका छन् ।
गत असोजदेखि शारीरिक रुपमा अस्वभाविक परिर्वतन आएसँगै उनलाई फलामको साङ्लोले बाँधेर राखिएको उनका बाबु सेबुलाल चौधरीले बताए ।
सेवुलालका अनुसार आकाशले घर छाडेर जतासुकै हिँड्ने, जे भेट्यो त्यही खाने र मानसिक सन्तुलन गुमाएको जस्तो व्यवहार देखाउन थालेका हुन।
दुई छोरामध्ये कान्छा छोरा हुन् आकाश ‘यसको आमा पनि छैन, सानैदेखि दुई छोराको लालनपालन गरिरहेको छु, मजदुर गरेर जसोतसो घर चलाउँदै थिए, अब चाँहि मुस्किल भयो,’ सेवुलाल भन्छन् ।
आफ्नो आर्थिक अवस्था ज्यादै कमजोर भएपछि उपचारका लागि छोरालाई अस्पतालसम्म लैजान नसकेको सेवुलालको भनाइ छ ।
यसैबीच सोही ठाउँका सामाजिक अभियानकर्मी कैशल भण्डारीले आकाशको उपचारका लागि सहयोग जुटाइदिन सबैसँग आग्रह गरेका छन् । उनले राम्रो उपचार पाए बालक ठीक हुनसक्ने भन्दै सहयोगी समक्ष आर्थिक सहयोग जुटाइदिन आग्रह गरेका छन् ।
मानसिक सन्तुलन गुमेका उनका छोरा घर छोडेर हिँड्ने भएका कारण उनलाई छोड्न नमिलेको हो । ‘धेरै पटक हिँडिसक्यो, कहिले बिर्तामोड, कहिले इलामको दानाबारीदेखि भद्रपुरसम्ममा फेला पारेर घर ल्याएको आकाशको परिवार र छिमेकीहरुले बताए ।
