काठमाडौं - पछिल्लो समय पूर्व राष्ट्रपति विद्यादेवी भण्डारी र प्रधानमन्त्री तथा नेकपा (एमाले)का अध्यक्ष केपी शर्मा ओलीबीचको मतभेदले सामाजिक सञ्जालमा चर्चा पाएको छ। चीन भ्रमणबाट फर्किएपछि भण्डारीले पूर्वी नेपालको गरेको भ्रमणलाई लिएर ओलीले टिप्पणी गरेपछि उनीहरूबीचको दूरी झनै बढेको देखिएको छ। विशेषगरी भण्डारीले "जिल्ला भ्रमण गर्न कसैलाई सोध्नुपर्दैन" भन्ने अभिव्यक्तिले मतभेद चुलिएको अनुमान गरिएको छ।
यसै सन्दर्भमा, एमालेभित्र भण्डारीले ओलीलाई चुनौती दिन सक्ने एकमात्र व्यक्ति भएको चर्चा पनि चलेको छ, जसका कारण पार्टीभित्र गुटबन्दी देखिएको विश्लेषण गरिएको छ।
तर, जनता समाजवादी पार्टी (जसपा) नेपालका प्रचार विभाग प्रमुख पूर्ण बस्नेतले भने यस विषयमा भिन्न धारणा राखेका छन्। उनका अनुसार, ओलीको विकल्प खोज्ने हैसियत स्वयं ओलीसँग मात्रै छ।
"पूर्व राष्ट्रपति विद्यादेवी भण्डारीले प्रधानमन्त्री ओलीलाई चुनौती दिँदैछिन् भन्ने प्रचार हास्यास्पद छ," बस्नेतले भने, "एमालेमा ओलीको विकल्प खोज्ने जिम्मेवारी उनी स्वयंको हो।"
बस्नेतका अनुसार ओली आफैं आफ्नो लोकप्रियताको स्थिति बुझिरहेका छन्। अहिले पार्टीभित्र र देशव्यापी रूपमा आफूप्रति बढ्दो नकारात्मक धारणा उनीलाई थाहा छ, जसका कारण उनले विकल्पको खोजी गर्न थालेका हुन्। सम्भावित उत्तराधिकारीका रूपमा उनले पूर्व राष्ट्रपति भण्डारीलाई रोजेका बस्नेतको बुझाइ छ।
"तर उनले यसलाई निकै कूटनीतिक र घुमाउरो तरिकाले अघि बढाइरहेका छन्," उनले थपे, "यही शैलीलाई केहीले भण्डारीले ओलीलाई चुनौती दिँदैछिन् भनेर बुझिरहेका छन्, जुन कुरा सही होइन।"
